Assalamualaikum Wr.wb
Alhamdulillahirobbil’alamin, washolatu
wassalamu ‘ala asyrofil’mursalin, wa’ala aalihi wa shohbihi wa man tabi’ahum
ila yaumidin. Ammaba’du
Kawula nuwun, panjenenganipun para sesepuh,
para pini sepuh, ingkang satuhu pana ing pimawas, lebda ing pitutur, keba ing
panembah, ingkang pantes pinundhi saha kinabekten.
Panjenenganipun para priyagung dharahing nata,
para sarjana surjaning budi, para pangemban pangembating praja satryaning
nagari, minangka pandam panduming para kawula dasih, ingkang pantes katuran
sagunging pakurmatan.
Para alim ‘ulama, ingkang rinten dalu tansah
sinanding kitab suci wahyuning ilahi, ingkang satuhu luhuring budi
Para baraya wira wiyata, ingkang marsudi ing
reh kridaning budaya myang karya.
Para kma karya labet praja, ingkang rhahambeg
uhuring darma, miwah para kadhang sutresna mudha werdha ingkang pantes
sindarsana, punapa dene para tamu kakaung sumawana putrid ingkang dahat
kalingga murdaning akrami.
Minangka
purwakaning atur, sumangga langkung rumiyin kawula ndereakaen manungku puja,,
ngunjuaken sembah puji syukur ngarsa dalem Gusti Ingkang Murbing Dumadi,
ingkang sampun kapareng paring rohmad, lan nikmat gumelaring alam agesang
wonten madyaning bebrayan agung, katitik rahayu sagung dumadi tansah kajiwa lan
kasalira dumatheng panjenengan sedaya dalasan kawula, sahengga kita saged
hanglonggaraken penggalih, haminaken wanci saha kaperluan rawuh kempal
manunggal wonten sasana pawiwahan mriki.
Para pinisepuh, sesepuh ingkang satuhu pantes
sinudarsana (kaula bekteni). Para rawuh kakung sumawana putri ingkang dahat ing
kinurmatan.
Kaparenga kula sumela atur, nggempil kamardikan
anggenipun sami wawan pangandikan. Kula minangka sulih sariranipun bapak lalang
palambang sakaluwangsa ingkang hamengku gati kaparenga matur ing ngarsanipun
para rawuh, medharake raos pangraos ingkang medal saking telenging manah.
Para rawuh ingkang dahat ing kinurmatan,
Ingkang sepisan bapak Imam Fauzan sarimbit ngonjukaken puji sukur dhumateng ngarsanipun Allah SWT , dene
awit barokah, rohmat saha hidayahipun ing titi wanci menika saged ngawontenaken
pawiwahan supitan putranipun ingkang angka I, ingkang sesilih asma adimas Abdullah Nurrokhim.
Kaping kalihipun bapak lalang palambang
sekaliyan mboten kesupen ngaturaken pambagya sugeng rawuh, ahlan wa sahlan
dhumateng para lenggah kakung sumawana putri kairing atur gunging panuwun
ingkang tanpa umpami. Dene panjenengan sami sampun kersa nglonggarake wekdal ,
ngenthengake sarira saha penggalih kangge ngestreni adicara menika sarta paring
donga pangestu dhumateng nak
mas Abdullah Nurrokhim.
Kaping tiganipun boten kesupen ngaturaken
gunging panuwun ingkang tanpa pepindhan katur para tangga tepalih, sanak
sedherek, mitra sutresna, tuwin para mudha-mudhi ingkang sampun kanthi lila
legawa paring pambiyantu lan panyumbang ingkang awujud punapa kemawon ingkang
ndadosaken rancaging adicara menika.
Bapak Imam sekaliyan namung saged memuji
mugi – mugi sedaya kesaenan panjenengan pikantuk lelintu ganjaran saking Allah
SWT ingkang matikel-tikel. Aamiin.
Mboten kesupen, wonten kiranging suba sita anggenipun ananggapi para
rawuh, saha kuciwaning anggenipun caos palenggahan , saha sanes – sanesipun
saestu bapak lalang palambang sekulawarga nyuwun agunging samodra pangaksami.
Ing wasana para tamu kasuwun kanthi saged
kaparenga anglajengaken anggenipun sami lelenggahan kanthi suka renaning
penggalih sinambi angresepi pasugatan ingkang kaladosaken ngantos dumugi
paripurnaning pawiwahan menika.
Cekap mekaten atur kula, mbok bilih anggen kula
ngaturaken pambagyaharja sugeng rawuh menika wonten galap gangsuling atur, saha
kirang trapsila anggen kula matur, mugi para rawuh kersa paring gunging samodra
pangaksomo.
Akhirulkalam wa Allahul muwafiq ila
aqwamithoriq
wassalamualaikum wr.wb
nuwun
Tidak ada komentar:
Posting Komentar